Bere ohiko musika banda tarte batez alboratu, eta Euskadiko Orkestra Sinfonikoko bost musikarik osatzen duten Kaabestri String Ensemble hari boskotearekin oholtzaratuko da Soreasu Antzokian Elorrieta. Estiloa ere aldatu du oraingoan, eta doinu klasikoagoetan murgildu da Oscar Lopez, Igor Torre eta Arkaitz Martinez biolinistak, Jon Arraz txelo jotzailea eta Paloma Torrado kontrabaxu jotzailea lagun dituela. Lau abesti berri grabatu dituzte Elorrietak eta Kaabestri String Ensemble taldeak egitasmorako, Jose Luis Otamendi edota Joseba Sarrionandiaren poemak musikatuta, besteak beste. Horretaz gain, Elorrietaren errepertorioko hainbat abesti ere moldatu dituzte hari boskoteari egokitzeko.
