Eraldaketa sozialarena esparru zabala da. Bertan lanean ari garenok, galduko ez bagara, heldulekuak behar ditugu, norabidea adieraziko diguten seinaleak. Bestela esanda, eraldaketa-prozesuen bidean lagunduko diguten bide-argiak behar ditugu. Eta, hona hemen funtsezko hiru bide-argi: euskalgintza eta hizkuntza gutxituen berreskurapen-prozesuak, feminismoa eta genero-berdintasunaren esparrua, eta ingurumena eta iraunkortasunaren arloa, beti ere planetaren eta baliabideen mugen ikuspuntutik.
Hainbat eta hainbat ditugu gizartea eraldatzeko lanean ari diren eragileak, izan herri ekimeneko, izan pribatu, izan publiko. Gorbeialdeko Kuadrillan ere hala ari gara. Goian aipatutako hiru zeharlerroek gizartearen eraldaketa- eta eraberritze-prozesuan izan dezaketen (edo izan behar luketen) papera jorratu nahi dugu jardunaldi honetan: non eta noiz egiten duten bat, nola lagundu dezaketen elkar, zer modutara argitu diezaioketen elkarri eraldaketarako bidea.
Horretarako gonbidatu ditugu gai honi buruz zer esan eta zer ekarri izango duten hiru aditu: Lorea Agirre antropologoa eta Jakin aldizkariko zuzendaria, Mikel Otero legebiltzarkidea eta ekintzaile ekologista, eta Ainhoa Olaso Euskal Herriko Bilgune Feministako kidea; Ane Zuazubiskar kazetariaren gidaritzapean ariko dira hirurak.