Tiruleque celebra o 20 aniversario da súa fundación onde recupera un repertorio de todos os seus traballos cunha escolma do seus mellores temas, a edición dun disco recompilatorio “Tiruleque 20 anos no camiño” e unha xira de concertos baixo o mesmo título.
Durante o treito do concerto interpretan algúns dos mellores temas dos catro traballos discográficos que até o momento ten o grupo, evidenciando tanto a evolución musical e estética como a diversidade de formacións polas que históricamente foi pasando a banda. ofrecendo unha experiencia inesquecible tanto para a banda coma para o público
Tiruleque nace como banda no 2002, ano no que cinco rapaces da Coruña procedentes da música tradicional, comparten as súas inquedanzas. Xurde así un proxecto musical que intenta desde un primeiro momento, mesturar un repertorio baseado en recollidas e cancioneiros tradicionais con outras moitas influencias e pezas propias. Esta evolución ao longo dos anos, leva ao grupo a engadir distintos instrumentos cos que levar máis aló esa tradición e creatividade. Deste xeito, a banda consegue acadar maior expresión, maiores posibilidades e un son propio recoñecible desde a primeira escoita que se plasma nos discos autoproducidos Tiruleque (2009), Mu!! (2013) e Outro que tal baila (2018).
Este camiño estivo marcado por centos de experiencias que forman parte do que hoxe é Tiruleque. Lugares, escenarios e persoas que marcaron o devir do grupo e o seu repertorio, que tivo a sorte de formar parte activa dese mundo vivo que une aos galegos e galegas nas romarías, foliadas, bailes e demais encontros que celebran a cultura do país.
Nos concertos van da man a pandeireta e o contrabaixo, a muiñeira e a cumbia, o pandeiro e o ukelele, o saxo e o porco de goma. Elementos que nun principio non se imaxinan xuntos son asimilados e devoltos dunha forma propia e ao mesmo tempo universal, buscando - como eles mesmos din - “contaxiar o mesmo entusiasmo, alegría e espírito festivo que sentimos nós cando escoitamos estas músicas por primeira vez”
Facebook: https://www.facebook.com/tiruleque
Spotify: https://open.spotify.com/artist/3kwUK8Y8H79MQiYQdlnJoo
iTunes: https://itunes.apple.com/us/artist/tiruleque/id824192888
